吃在鄰里 (貳)

蓮香樓

你說得出蓮花和荷花的分別嗎？

從來不喜歡舊派中式酒家。只是呢，父親節的主角要去吃釀鯪魚，咁，就唯有去囉。

‧麻煩
又要訂檯又要訂餸，搞一大輪先有得食，實在非本人懶惰+即興的性格會做的事情。是晚預訂了釀鯪魚、炆斑翅、蓮蓉包；現場加點炒馬蹄、生炒骨、葛菜湯。除了炆斑翅外，其實全部都是我唔喜歡食的野來的。表面證供：我是一個很孝順的女兒。

‧食味麻麻
呢種殘留下來的歷史食店 (?) ，大部份都有個共通點，就係食味其實麻麻。ok，我承認有些菜式的確在外面已經很少人做，例如釀鯪魚。不過，「肯做功夫菜 / 舊菜」與「做得好吃」邏輯上是兩碼子的事。釀鯪魚又奀又唔彈牙；炆斑翅調味多過魚味 (雖然已經是全蓮香我最喜歡的一道菜了)；蓮蓉包似神檯鬆糕；炒馬蹄就是很屋企那個炒馬蹄、生炒骨呢個我最憎食所以無試但賣相瘦骨嶙峋… 成餐飯我都冇黑面，表面證供：我真是一個很孝順的女兒。
 
‧嘈
不喜歡舊派的中式酒家，除了食味麻麻之外，最主要還是「嘈」。不知何解，呢種酒樓總是嘈到咩都聽唔到講唔到。一家人坐埋一張檯用博命嗌交的聲浪先勉強聽到對面位講野，一晚下來我啞咗七成。如果不是主角要求，我打死都唔會去食飯，或者下次我要教識亞媽Whatsapp之後先好再去，坐底有咩whatsapp見，唔使開口就最好。表面證供：我實在是一個很孝順的女兒。



為什麼吃在鄰里 (貳)沒有寫牛記茶室呢？其實是無得解的。剛巧本人在蓮香吃過飯又覺得可以記一下，結果就變成咁樣囉。



【完】




-----------------------------------------------------




來佬餐館

之前見正在裝修的舖位掛上「香港大牌檔」的橫額，以為我心愛的香港大牌檔要登陸中環了！誰知道過幾天橫額就被失蹤了！就在這個週末，發現「來佬餐館」正式著陸了！！

來佬餐館其實也是香港大牌檔的同系啦，背後都是同一個老闆，看樣子都是賣情懷的店，格局沒有香港大牌檔般大牌檔，氣氛和裝潢都像太平館。

茂利而大無謂的本人，在身旁的人一直提著人家好像未開門呀的情況下，還是按制開了餐館的門。呀，原來6月25才Soft Opening，22-24號會試賣午市外賣飯盒，兼送lunch box pack，包括飯盒袋和祝君午安毛巾仔，我都好想要呀(貪心mode又來…)。


來佬餐館 Loyal Dining (Facebook Page)
地址：中環威靈頓街66號，近鏞記